பயனுள்ள பொழுதுபோக்கு : இயற்கையின் நியதி

Showing posts with label இயற்கையின் நியதி. Show all posts

Wednesday, 24 February 2016

இயற்கையின் நியதி - 6

(The Law of Karma)

இந்த பிரபஞ்சத்தில் ஒலி, அதிர்வு இல்லாத இடமே கிடையாது. ஒலியினால் அதிர்வும், அதிர்வினால் ஒலியும் ஏற்படும் அளவிற்கு இரண்டும் ஒன்றோடு ஒன்று இணைந்திருக்கிறது. மெல்லிய ஒலி, அதிர்வுகளை உணரும் சக்தியை நாம் இழந்து விட்டோம்.

நாம் இயற்கையோடு இயைந்து வாழும் வாழ்க்கையிலிருந்து மாறி, விஞ்ஞான வாழ்க்கைக்கு வந்துவிட்டோம். விஞ்ஞான வாழ்க்கையில் நம் உடலில் பல அரிய இயற்கை சக்திகளை இழந்து வருகிறோம் என்று மருத்துவர்கள் கூறு கிறார்கள். விஞ்ஞானத்தால் உலகில் பல நன்மைசெய்யும் உயிரினங்கள் அழிந்துவிட்டன என்று விஞ்ஞானிகள் கூறுகிறார்கள்.

பழங்காலத்தில், விஞ்ஞானம் இல்லாத காலத்தில் நமது ரிஷிகள், ஞானிகள் இயற்கை நியதிகள் பற்றியும், கர்மா பற்றியும் சொல்லிவிட்டு போயிருக் கிறார்கள். தற்காலத்தில் விஞ்ஞானி நீயூட்டன் ஒரு கண்டுபிடிப்பை கூறியது அது கர்மா என்னும் நியதியை உறுதி செய்கிறது.( Every action, there is an equal and opposite reaction )

பிரபஞ்சத்தில் அனைத்தும் ஒரு வட்டப்பாதையில் ( Circle ) பயணிக்கின்றன. தான் புறப்பட்ட இடத்திற்கு திரும்பி வரும்போது "போனது திரும்பிவருகிறது"

( Reciprocation ) என்கிறோம்.

பிரபஞ்சத்தில் ஒவ்வொரு படைப்பும் அதிர்வுகளின் ஆரம்ப புள்ளி.

ஒவ்வொரு மனிதனின் எண்ணம், சொல், செயல்களும் அதன் தன்மைக்கேற்ப அதிர்வுகளை (Action) ஏற்படுத்தும் திறன் கொண்டவை. நமக்குத் தெரியாமலே தானியங்கியாக இது நடந்து கொண்டிருக்கிறது. நாம் விரும்பினாலும், விரும்பாவிட்டாலும் இது நடந்துகொண்டிருக்கும். இந்த அதிர்வுகள் தனது வட்டப் பாதையில் பல்வேறு இயற்கை நியதிகளுக்கு உட்பட்டு அதன் தன்மைக்கேற்ப நன்மையாகவோ, தீமையாகவோ, பலமாகவோ, பலவீனமாகவோ ஆரம்பமான இடத்துக்கு வருகின்றன. இதை எதிர் சக்தி (Reaction) என்று சொல்லலாம். நாம் நம்பினாலும், நம்பாவிட்டாலும் அது நடந்து கொண்டிருக்கும்.

கர்மா ( ஊழ்வினை ) என்பது சம்ஸ்கிருத வார்த்தை. ஒவ்வொரு மனித உடலிலிருந்தும் நினைப்பு, சொல், செயல் மூலம் உற்பத்தியாகும் அதிர்வுகள் எதிர் சக்தியாக திரும்பி வருவதை கர்மா என்கிறார்கள். இதனால் வாழ்க்கையில் திடீர் மாற்றங்கள், தலைகீழ் மாற்றங்கள் நடக்கின்றன. இது அதே பிறவியிலும் நடக்கலாம், அடுத்த பிறவியிலும் நடக்கலாம் என்கிறார்கள். சில சம்பவங்களை கேள்விப்படும் போது அது மிக துல்லியமாகவும், ஆச்சரியமாகவும் இருக்கிறது. சிலரது வாழ்க்கையை பார்க்கும் போது எல்லோரிடமும் ஒரேமாதிரி நடக்காமல் நிச்சய மற்றதாக இருக்கிறதே என ஐயம் வரும் படி இருக் கிறது.

ஊழ்வினைக்குப் பரிகாரம் செய்யப் போனால் அங்கேயும் ஊழ்வினைதான் முன்வந்து நிற்கும் என்று திருவள்ளுவர் கூறுகிறார். சிரமம் பாராத விடாமுயற்சி ஊழ்வினையை தணிக்கும் என்றும் திருவள்ளுவர் கூறுகிறார்.

பொதுவாக ஒருவருடைய எண்ணம், சொல், செயல் வேறு ஒருவரை அநியாயமாய் பாதிக்குமானால் அவரது வேதனைகள் கர்மாவை வலிமை யாக்கி தண்டிக்கிறது. அதேபோல் ஒரு வருடைய எண்ணம், சொல், செயல் வேறு ஒருவருக்கு நன்மை செய்து அதனால் அவர் வாழ்த்தும் போது கர்மா வலிய வந்து உதவுகிறது. ஒழுங்கற்ற ஒரு ஒழுங்காய் இயற்கையின் நியதிகள் நடப்பதை நம்மால் புரிந்து கொள்ள முடியவில்லை.

நமது நினைப்பு, பேச்சு, செயல் எல்லாம் ஒரு சக்தி ( அதிர்வு ) உற்பத்தியாக காரணமாகிறது. இந்த சக்திக்கேற்ற எதிர் சக்தி புதிய வேகம், அல்லது இடைநீக்கம் பெறும் தன்மை அடைகிறது. அனேகம்பேரால் தன்னால் உருவாக்கப்பட்ட சக்திகளை ஒழிக்க முடியாமல் போகிறது. தனது எண்ணம், சொல், செயல் என்னும் நடவடிக்கையின் பின்விளைவுகளிலிருந்து யாரும் தப்பிக்க முடியாது. நல்லவர்களாய் இருக்கவேண்டியது அவரவர் கடமையும், பொறுப்புமாகும்.கெட்டவர்களை மக்கள் கண்டிக்கிறார்கள், நீதிமன்றம் தண்டிக்கிறது. தோல்வி, இழப்பு என்று இயற்கையின் நியதிகள் தண்டிக் கின்றன.

பின்விளைவு இல்லாதது என்று நாம் சிலதை நினைத்தாலும், இந்த பிரபஞ்சம் எல்லாமே ஒன்றுக்கொன்று தொடர்புடையது. ஒவ்வொரு செயலும் அடுத்த செயலுக்கு காரணமாகிறது. அது அப்படியே தொடர்ந்து, முதல் செயல் கடைசி செயலுக்கு காரணமாகிறது. கடந்த காலம், நிகழ்காலம், எதிர்காலம் எல்லாம் சங்கிலித் தொடரானது.

நமது பாதையை மாற்றவேண்டிய நேரத்தில் மாற்றிக்கொள்ளவிட்டால் அதே தவறுகள் திருப்பி நடக்கும்.( History repeats) )

செயலுக்கேற்ற பலன் வராமல் போகாது. செயலின் நோக்கம், அதற்கு செலவிட்ட சக்தி அதற்கேற்ற பலனைத் தரும்.

எதை விதைக்கிறோமோ அதைத்தான் அறுவடை செய்வோம்.

நமது சூழ்நிலையை நமது ஆழமான எண்ணங்கள் தான் தருகிறது. நமக்கு என்ன வேண்டுமோ அதே எண்ணமாய் இருக்க வேண்டும்.

நம்மால் வெளியே யாரையும் மாற்ற முடியாது. நம்மை நாமே மாற்றிக் கொள்வது தான்எளிதான செயல் என்று பெரியவர்கள் கூறுகிறார்கள்..

------------------------------------------------

Thursday, 19 March 2015

இயற்கையின் நியதி -5 ( The Law of Remedy)

இயற்கையின் நியதி - 5
( The Law of Remedy)

தென் இந்தியாவில் ஒரு பிரபல தொழில் அதிபர். தொழில் மூலம் நிறைய வருமானம். மிகவும் கண்டிப்பானவர். பரிவு, மன்னிப்பு, இரக்கம் என்பது அவரிடம் கிடையாது. சிறு தவறு நடந்தால் கூட வேலையி லிருந்து நிறுத்திவிடுவார். வியாபாரம் மிகச்சிறப்பாக போய்க்கொண்டிருந்தது.

அவருக்கு இரண்டு மகள்கள். மகள் களுக்கு திருமணம் செய்து வைத்தார். மிகக்குறுகிய காலத்தில் இரண்டு மகள்களும் விதவையாகி விட்டார்கள்.

வேதனையில் துடித்தார் .தூக்கம் இழந்தார்.சாப்பாடு பிடிக்கவில்லை. தன்னுடைய மனக்கஷ்டத்திர்க்குரிய காரணங்களை ஆராய்ந்தார். சுயவிசாரணை செய்தார்.இதுதான் காரணமாக இருக்குமோ என சில சம்பவங்கள் அவரை உறுத்தியது.இதற்கு என்ன செய்வது என்று யோசித்தார்.

தான் தொழில் நடத்தி வந்த இடத்தில் கல்வி, மருத்துவம்,உணவகம்,என அமைத்து மிக குறைந்த விலையில் மிக உயர்ந்த தரத்தில் பொதுமக்களுக்கு வழங்கி அவர்கள் மகிழ்ச்சியாய் வந்து,போவதை பார்த்து திருப்தி படுகிறார்.

தென் தமிழ் நாட்டில் இரண்டு நண்பர்கள். ஒருவர் ஒரு சொத்து ஒன்று வாங்கு கிறார். சில காரணங்களுக்காக அதை தன் நண்பர் பெயரில் பதிவு செய்து, நண்பரிடம் எனக்கு தேவைப்படும்போது இந்த சொத்தை என் பெயரில் பதிவு செய்து கொடு என்கிறார். நண்பரும் சரி என்கிறார்.

காலம் கடந்தது.ஒரு நாள் சொத்தை தன பெயரில் பதிவு செய்யவேண்டும் என்று கேட்கிறார். நண்பர் முடியாது என மறுத்து விடுகிறார்.

சொத்தை தர மறுத்தவருக்கு இரண்டு மகன்கள.இருவருக்கும் திருமணமாகி மனைவி குழந்தைகள் இருக்கிறார்கள்.

சில வருடங்களில் சொத்தை தர மறுத்தவரும்,சொத்தை வாங்கியவரும் இறந்து விடுகிறார்கள்.சொத்தை தர மறுத்தவரின் இரண்டு மகன்களும் ஒருவர் பின் ஒருவராக இளம் வயதில் சாலை விபத்தில் இறந்து விடுகிறார்கள்.

சொத்தை தரமறுத்தவரின் பேரப்பிள்ளைகள் நிம்மதி இழந்து சோகத்தில் ஆழ்ந்தார்கள்.யாரோ ஒருவர் குழந்தை களிடம் மேற்கண்ட விபரத்தை கூறி நட ந்த அகால மரணங்களுக்கு அதுவாக கூட காரணமாயிருக்கலாம் என தங்கள் மனதில் தோன்றியதை சொன்னார்கள்..

அது மாதிரி சொத்து நமக்கு வேண்டாம் என்று குழந்தைகள் முடிவெடுத்து, சொத்தின் உரிமையாளரின் வாரிசுக்கு அதை திருப்பி கொடுத்து விட்டார்கள்.

மேற் படி நடந்த இரண்டு நிகழ்ச்சிகளைப்போல் பலரும் பல நிகழ்ச்சிகளை கூறுவார்கள்.வெளியில் இருந்து பார்க்கும் போது தெளிவாக தெரிவது நமக்கு நடக்கும்போது நமக்கு தெரிவதில்லை. நாம் ஏதாவது காரணங்களை கூறி நமக்கு நடப்பதை நியாயப்படுத்திக் கொள்கிறோம். எல்லா தவறு களுக்கும் பரிகாரம் உண்டு.

நமது வாழ்க்கையிலும், மகிழ்ச்சியிலும் அக்கறை உடையவர்கள் நம்முடைய தவறுகளை எடுத்துச் சொல்லும் போது அதை புரிந்து கொண்டு நம்மை நாம் மாற்றிக்கொள்ள முயற்சிக்க வேண்டும். நாம் வருந்தி திருந்த நினைக்கும் போது The Law of Remedy நமக்கு உதவ முன்வரும்.

மனம் வருந்தி உண்மையை உண்மையாகவே தேடும் போது பரிகாரம் என்ன என்பது தெரியவரும்.அவரவருக்கு அவரவரே தேடிப்பார்த்துக் கொள்ள வேண்டும். அடுத்தவர் சொன்னால் யாரும் ஏற்றுக்கொள்ளப் போவதில்லை.

நடந்த தவறை பிறர் கூறியோ, அல்லது தானாக புரிந்தோ, ஒருவர் உணர்ந்து, வருந்தும் போது அவர் நோகும் படியாக நேரடியாகவோ, பிறரிடம் கூறியோ, பரிகாசம், இளக்காரம் பேசுவதால், அப்படிப் பேசுபவருக்கு குற்றம் சேருகிறது.

எல்லா செயல்களும் காரணம்-காரியம்-பின்விளைவு-பரிகாரம் என்னும் சட்டத்துக்குட்ப்பட்டது.

----------------------------------------------------

Saturday, 28 February 2015

இயற்கையின் நியதி -4 (The Law of cause and effect.)

இயற்கையின் நியதி - 4

(The Law of cause and effect)

புத்தர் ஒரு அரசனின் மகன்.ஒரு நாள் அவர் பார்த்த காட்சிகள் அவரை மிகவும் பாதித்தது.மனிதனுக்கு மட்டும் ஏன் இவ்வளவு நோய், தள்ளாமை, துன்பம் என்று சிந்திக்கலானார் அதற்கு விடை தேடிகாட்டிற்கு சென்று கடுந்தவம் செய்தார். ஆசையே துன்பங்களுக் கெல்லாம் காரணம் என்ற இயற்கையின் நியதியை உணர்ந்தார்.

ஆசைப் படுங்கள், ஆனால் உங்கள் ஆசை பிறரை பாதிக்கக் கூடாது.உங்கள் ஆசையில் நியாயம் (தர்மம்) இருக்க வேண்டும். உங்களது நியாயமில்லாத ஆசை, பிறரை பாதிக்கும் போது ஏதாவது ஒரு வழியில் துன்பம் வந்து சேருகிறது என்று அறிவுரை வழங்கினார். தனக்கு வந்த அரச பதவியை மறுத்தார். தனக்கு என்று ஒரே ஒரு செட் உடை மட்டுமே வைத்துக்கொண்டார். தினமும் ஒரு வீடு என்று உணவு வாங்கி சாப்பிட்டார்.

தன்னைப்போல் யாரும் கடும் தவம் புரிந்து வருத்திக்கொண்டு வாழ வேண்டாம். அதே சமயம் சுகபோகங்கள் தான் வாழ்க்கை என்று மனம் போன போக்கில் வாழவும் வேண்டாம், நியாயமான ஒரு மத்திய வழியில் வாழுங்கள், நல்லவனாய் இருங்கள், நன்மையாய் இருங்கள் என்று உபதேசித்தார்.

முதலில் தகுதி உடையவர்களாகுங்கள் பிறகு ஆசைப் படுங்கள். முதலில் உங்கள் எல்கையை தெரிந்திருங்கள், பிறரது உரிமையை மதியுங்கள் அதன் பிறகு ஆசைப்படுங்கள்.

நமது மனம் போன போக்கில் சரி - தவறு, பின்விளைவு எதையும் சிந்திக் காமல் நடப்பது மகிழ்ச்சியாய் இருக்கிறது, ஆனால் நாளை அது செய்யும் பின்விளைவுகள் துன்பமாய் வந்து சேருகிறது இதை The Law of cause and effect எனலாம்.

சுயநலம் பின்விளைவை கருதாமல் போனால்-
சுயநலம் பின் பலனை சிதைத்துவிட்டுப் போகும்
பரஸ்பரம் மரியாதையை தொடராமல் போனால்-
பரஸ்பரம் தொடர்பு இல்லாமல் போகும்
உதவும்பொருளை பேணாமல் போனால்-
பேணாத பொருள் உதவாமல் போகும்
மனசாட்சி தெய்வபயமற்று ஆணவமாய் போனால்-
தெய்வநீதி மனசாட்சியற்று அமைதியாய் போகும்

காரணமில்லாமல் எந்த காரியமும் இல்லை, காரணத்தை ஆராயும் போது தீர்வு காண்பது சுலபம்.காரணங்கள் தெரியாதபோது விதியே காரணமாகிறது.

----------------------------------------------------------

இயற்கையின் நியதி -3 (The Law of Reciprocation)

     இயற்கையின் நியதி - 3
   (The Law of Reciprocation)

மனிதன் தான் நடத்தும் செயல் அதற்கேற்ப அடுத்தவர் தரும் எதிர்ச்செயல் என்பது போல் நம் கண்ணுக்குத்தெரியாமல் இந்த இயற்கையிலும் மிக அமைதியாக பதிலுக்குப்பதில் என்பது நடந்து கொண்டிருக்கிறது. பதிலுக்கு பதில் என்பதை இயற்கையும் செய்கிறது.

சுமார் பத்தாயிரம் ஆண்டுகளுக்கு முன்னால் மனிதன் திறந்த வெளியில், மர நிழலில் தங்கி, காய், கனி, கிழங்கு போன்றவை களை மட்டும் உண்டு வாழ்ந்து வந்தான் அவனால் இயற்கைக்கு எந்த தொந்தரவும் இல்லாதிருந்தது. அப்போது பெய்த மழை, தனக்குத்தானே ஆறுகளையும் நதி களையும் உருவாக்கி கொண்டது. அந்த அளவிற்கு மழை விடாமல் பெய்திருக்கிறது. இயற்கையான உணவுகளை மட்டும் மனிதன் உண்டு வந்தான். இயற்கை அவனுக்கு குளிரையும் வெப்பத்தையும் தாங்கும் சக்தியை கொடுத்தது. மருத்துவம் என்பது இல்லாதிருந்தது. நாகரீக உணவுகள் மனிதனுக்கு இளமையில் முதுமை நோய்களை பரிசாக கொடுக்கிறது. மனிதனுக்குரிய மருத்துவ மனைகள் பெருகிக்கொண்டு போகின்றன

மனிதன் இயற்கையை பாதிக்காமல் நடந்தது வரை இயற்கையும் அவனை பாதிக்கவில்லை.

நாம் நமது சொகுசுக்காக மரங்களை அழித்தோம் வானிலை ஒழுங்கற்ற தாக ஆகிவிட்டது.பெரிய, பெரிய ஆலைகளினாலும், கணக்கற்ற வாகனங் களினாலும் பூமியின் ஆகாயப்பகுதியின் வெப்பத்தை அதிகப்படுத்தினோம். அதனால் பூமியின் வெப்பம் அதிகரித்து. துருவப் பகுதியிலுள்ள பனிப் பாறைகள் உருக ஆரம்பித்து விட்டன, இது மேலும் தொடர்ந்தால் கடல் நீர் மட்டம் உயர்ந்து கடல் நீர் நிலத்துக்குள் வரும் என்று விஞ்ஞானிகள் எச்சரித்துக் கொண்டிருக்கிறார்கள்.

நம் செயலுக்கேற்ப இயற்கையும் பதில் செயல் செய்து கொண்டிருக்கிறது. இது ஒரு நியதிக்கு உட்பட்டே நடக்கிறது அந்த நியதியை The Law of Reciprocation எனலாம்.

இதேபோல் மனிதருக்குள்ளும் ஒருவருக்கொருவர் பரஸ்பரம் உதவி, மதித்து நடக்கும் வரை அந்த உறவு அமைதியாக போய்க்கொண்டிருக்கும். அதில் யாராவது ஒருவர் முரண்பாடாக நடந்து பரஸ்பரத்தை பராமரிக்க வில்லை யானால் அந்த உறவில் குழப்பம் ஏற்படும். இயற்கையின் The Law of Reciprocation அங்கு தனது வேலையை செய்யும்.

நடைமுறையைமதித்து, உண்மையாய், நன்மையாய், நியாயமாய் ஒருவருக் கொருவர் பரஸ்பரம் நடக்கும் போது அந்த உறவை The Law of Reciprocation காப்பாற்றும்.

இதில் யாராவது ஒருவர் அலட்சியமாய் நடந்து உண்மைக்கு பதில் சாமர்த்திய மாய் நடந்தால் அந்த உறவுக்குள் The Law of Reciprocation கொந்தளிப்பை ஏற்படுத்தும்.

பதிலுக்குப்பதில் செய்யும் உந்துதல் எல்லோருக்கும் உண்டு. நாம் ஒரு பொருளையோ, உதவியையோ, அலட்சியத்தையோ, மரியாதையையோ ஒருவருக்கு கொடுத்தால் அவரும் அதை திருப்பி செய்யவேண்டும் என்று நினைப்பார்.

சிலசமயம் பலனடைந்த பிறகு உதவியையும், உதவி செய்தவரையும் மறந்து விடுவார். எந்த விஷயத்தில் பதிலுக்குப்பதில் செய்யவேண்டும் யாரிடமெல்லாம் பதிலுக்குப்பதில் செய்யக்கூடாது என்ற கட்டுப்பாட்டை மீறுபவர்கள் சிக்கலில் மாட்டிக்கொள்வார்கள்.

செய்யக்கூடாத நபரிடம் செய்யக்கூடாத விஷயத்தில் பதிலுக்குப்பதில் செய்வதால் சரி செய்யமுடியாத காயத்தை( The Law of Reciprocation) ஏற்படுத்தும்.

தவறுவது மனித இயல்பு. செய்த தவறை நியாய வழியில் முடிவுக்கு கொண்டு
வரவேண்டியது அவரவர் பொறுப்பாகும்.

--------------------------------

இயற்கையின் நியதி -2 (The Law of Compensation)

இயற்கையின் நியதி -2
(The Law of Compensation)

இயற்கையின் செயல் களை உற்று கவனித்தால் அதில் ஒரு ஒழுங்கு இருப்பதை காணலாம்.

ஒரு மகிழ்ச்சிக்குப் பிறகு தோல்வியும், ஒரு பெரிய சிரமத்துக்கு பிறகு ஒரு நன்மையும் பல தடவை நமக்கு நடந்திருப்பதை பார்த்திருக்கலாம்.

மாட்டு வண்டி இருந்த காலத்தில், மெதுவாக சென்றோம். காற்று சுத்தமாக இருந்தது.சுவசக்கோளாறு அவதி இல்லை. மோட்டார் வண்டி வந்த பிறகு வேகமாக செல்கிறோம் காற்று மாசடைந்து ஆரோக்கியம் பாதிக்கப்படுகிறது. இதை போல் நிறைய உதாரணங்களை சொல்லலாம்.

இதெல்லாம் எதோ தற்செயலாய் நடக்கவில்லை.காரணம்-காரியம்-பின்விளைவு-பரிகாரம் என்னும் சுழற்சியில் நடக்கும் ஒருஇயற்கையின் நியதி ஆகும்.இதை The Law of Compensation எனலாம் .

ஒன்றை கொடுத்த இறைவன் மற்றொன்றை கொடுப்பதில்லை.திறமையை கொடுத்தவன், அழகை கொடுப்பதில்லை, அழகை கொடுத்தவன் குணத்தை கொடுப்பதில்லை, அழகையும் திறமையையும் கொடுத்தவன் ஆரோக்கியத்தை கொடுப்பதில்லை. ஆரோக்கியத்தையும் திறமையையும் கொடுத்தவன் பணத்தை கொடுப்பதில்லை. இப்படி சொல்லிக் கொண்டே போகலாம்.. ஈடு செய்யும் நியதிக்கு இதேபோல் பலரிடம் பல உதாரணங்களை காண்கிறோம்..

அவரவருக்கு, அந்தந்த வீட்டுக்கு, அந்தந்த ஊருக்கு, அந்தந்த நாட்டுக்கு என்று ஒரு குறிப்பிட்ட அளவு கொடுப்பினைகள் நிர்ணயிக்கப் பட்டிருக்கிறது. ஒன்று போகும் போது அதற்கு அதற்கு ஈடாக வேறொன்று வருகிறது. அல்லது ஒன்று வரும்போது ஏதோ ஒன்று போய் விடுகிறது வருவதற்கும் போவதற்கும் காரணங்கள் இருக்கிறது . .சிறிய நாடாக இருக்கும் ஆனால் செழிப்பாக இருக்கும், விரிந்து பரந்த நாடாக இருக்கும் ஆனால் பாலை வனமாக இருக்கும்.

அதிவேக வளர்ச்சி உடனடி வீழ்ச்சி (steep rise sudden fall) இறைவன் ஒரு கதவை மூடினால் மற்றொரு கதவை திறப்பான் என்று பழமொழிகள் உண்டு. இது.

The Law of Compensation செயலாகும்

இயற்கையின் நியதிகளுக்கு உட்பட்டு நாம் வளர வேண்டும், நமக்கு எல்லா வசதியும் வேண்டும் நாம் என்ன தான் செய்வது.

எல்லாவற்றிக்கும் ஒரு விலை உண்டு. அதை இன்றோ, நாளையோ கொடுத்தே ஆகவேண்டும் இயற்கை ஈடு செய்யாமல் விடாது .ஆனால் அந்த விலை என்ன என்று நமக்கு தெரிவதில்லை. பலரும் பல விதமாக கொடுத்துக் கொண்டு தானிருக் கிறோம்.

இந்த ஈடு செய்யும் நியதியை நாம் பல சமயம் பேசுகிறோம், இயற்கை சிலரை தண்டிப்பதையும் இயற்கை சிலரை தூக்கி விடுவதையும் காண்கிறோம்.ஆனால் நமக்கு லாப மென்றால் பல சமயம் நியதியை மறந்து விடுகிறோம். தீயவர்கள் சொகுசாய் இருப்பதற்கும் நல்லவர்கள் துன்பப்படு வதற்கும் காரணம் நமக்கு தெரிவதில்லை.

ஆனால் இயற்கையின் ஈடு செய்யும் நியதியானது (The Law of Compensation) ஒவ்வருவருக்காகவும் சதா வேலை செய்து கொண்டிருக்கிறது. யாருக்கு எந்த சமயம் என்ன நடக்கும் யாரறிவார். இதுதான் உண்மை .

நமக்கு வரவேண்டியவை எதுவானாலும் நியாயமான வழியில் வரவேண்டும். நமக்கு இருக்கும் நல்லவைகளை காப்பாற்றிக் கொள்ள நமது சுயநலத்தை கொஞ்சம் குறைத்துக்கொள்ள வேண்டும். இதுதான் The Law of Compensation நமக்கு சொல்லும் பாடம்.

எளிமை, உழைப்பு, கடமை, நியாயம், அவசரத்துக்கு உதவி என நடந்து, தெரிந்தும் தெரியாமலும் நடந்த தவறுகளை மன்னிக்க வேண்டும், மீண்டும் தவறு செய்யாதபடிஎன்னை தடுத்து நிறுத்த வேண்டும் என்று வேண்டி ,

The Law of Compensation - ஐ வணங்குவோம்.

-------------------------------------------

Friday, 27 February 2015

இயற்கையின் நியதி -1 (The Law of Harmony )

இயற்கையின் நியதி - 1

(The Law of Harmony )

இந்த உலகமும்,இந்த பிரபஞ்சமுமான இந்த இயற்கை ஏதோ தாறுமாறாக இயங்கவில்லை .

அது ஒரு சட்டம்-ஒழுங்கில் கரணம்-காரியம்-பின்விளைவு-பரிகாரம் என்கிற சுழற்சியில், மாறுதல்களை அடைந்துகொண்டே போகிறது.

மாறுதல் என்பது மட்டும் நிற்காமல் போய்க்கொண்டே இருக்கிறது.

இயற்கையில் நடக்கும் பல்வேறு செயல்களை காணும் மனிதன் இந்த செயல்களெல்லாம் சில நியதிகளுக்கு உட்பட்டுத்தான் நடக்கிறது என்று உணர்ந்து அவைகளில் தெளிவு படுகிறான்.அவைகளை இயற்கையின் நியதிகள் என்கிறான்.

ஒரு வாய்ப்பாட்டு கச்சேரியில் வித்தியாசமாக ஒலி எழுப்பும் பல இசைக்கருவி களை ஒரே நேரத்தில் உபயோகப்படுத்தி ஒரு இனிமையான இசையை,பாடலை நமக்குத் தருகிறார்கள். வாய்ப்பாட்டுடன், வயலின், மிருதங்கம்,கடம், தம்புரா, ஹார்மோனியம் என பல வித்தியாசமான கருவிகளை ஒரு ஒற்றுமையோடு வாசிப்பதில் அனைத்து கலைஞர்களும் ஒரே மனதுடனும், முழுமனதுடனும் உழைக்கிறார்கள் அவரவர் இஷ்டப்படி ஒருவருக்கொருவர் சம்பந்தமில்லாமல் வாசித்தால் அதை யாரும் கவனிக்கப்போகிறது இல்லை

பல வித்தியாசங்கள் இருந்தாலும் நோக்கம் ஒன்றாக இருந்தால் பலன் தானே வரும் என்பதுதான் இந்த இயற்கையின் நியதி, இதை Law of Harmony எனலாம்.

நீர், வெப்பம், காற்று, நிலம், ஆகாயம் என ஐந்து வித்தியாச மான பொருட்கள் ஒரு ஒற்றுமையான நிலையில் இருக்கும் போது அங்கு உயிரினங்கள் தோன்றுகிறது. The Law of Harmony என்னும் இயற்கையின் நியதி நடக்கிறது.

நான்கு விளையாட்டு வீரர்கள் நான்கு விதமான குணங்களுடன் இருக்கிறார்கள் அவர்கள் ஒரு அணியாக விளையாடும் போது நம் அணி தான் வெற்றி பெறவேண்டும் என்கிற ஒரே குறிக்கோளில் விளையாடினால் தான் வெற்றி பெறமுடியும்.அதற்காக The Law of Harmony வேலை செய்யும்.

அதேபோல் ஒரு குழுவில், அல்லது ஒரு குடும்பத்தில் உள்ள வித்தியாச குணமுடைய அத்தனை பேரும் தங்களுக்குள் ஒரு பொது குறிக்கோளை ஏற்படுத்திக்கொண்டு அது லாபம், வளர்ச்சி, ஒற்றுமை, உறவு தான் முக்கியம், என எதுவாகவும் இருக்கலாம். அனைவரும் முழு மனதுடனும் ,அதே கவனத்துடனும் இருந்தால் அவர்களது குறிக்கோளை The Law of Harmony என்கிற இயற்கையின் நியதி நிறை வேற்றித் தரும்

நானே மேலானவன், சுயநலம், பொறாமை, ஏமாற்று, ஆதிக்கம், என்கிற உந்துதல்களுடன் ஒருவர் உறவாடினால்கூட The Law of Harmony என்னும் இயற்கையின் நியதியால் அந்த குழுவிற்கு பலன் கிடைக்காது..

-------------------------------------

Saturday, 21 February 2015

இயற்கையின் நியதிகள் ( THE LAWS OF NATURE )

இயற்கையின் நியதி

மனிதன் ஏற்படுத்திய சட்டமாகட்டும், இயற்கை ஏற்படுத்திய சட்டமாகட்டும் சட்டம் பற்றி தெரியாது என்பதால் மன்னிப்புக் கிடையாது. மனித சட்டங்களை மீறுபவர்களை கண்காணிக்க போலீஸ், வழக்குரைஞர், நீதிபதி என மனிதர்கள் இருக்கிறார்கள். இயற்கைன் நியதி களை மீறுபவர்களை கண்காணிக்க பாதிக்கப்பட்டவர்களின் மனவலி, உடல்வலி போன்றவைகள் ( கடல் நீரானது ஆவியாகி மேகமாகி மழையாவது போல ) எண்ண அதிர்வுகளை உண்டாக்கி அதனதன் வலிமைக்கேற்ப பின்விளைவுகளை உண்டு பண்ணு கின்றன.

பத்தாயிரம் ஆண்டுகளுக்கு முன் மனிதன் திறந்த வெளியில் மரநிழலில் காய், கனி, கிழங்குகளை மட்டுமே உண்டு வாழ்ந்து வந்தான். அன்றாடம் உணவை தேடி அலைவது மட்டுமே அவனது ஒரே வேலை யாக இருந்தது.

மனிதனுக்கே உடைய சிந்தனை திறனாலும், உடல் வாகாலும் இயற்கையில் கிடைத்தவை களில் மாற்றங்கள் செய்து தனது தேவை, வசதிகளை வளர்த்துக்கொண்டான். இயற்கையின் செயல் பாடுகளை உற்று கவனித்து அதன் சட்டம் ஒழுங்கை புரிந்து கொள்ள ஆரம்பித்தான்.

பல விஞ்ஞான விதிமுறைகளை கண்டுபிடித்து அவைகளை செய்முறையில் விளக்கினான்.ஆன்மீகத்தில் நாட்டம் கொண்டவர்கள் பல ஆன்மீக விதிகளை போதித்தார்கள்.சிந்தனையாளர்கள் பல பழமொழிகளை வழக்கத்தில் பேசி வந்தார்.

மனிதன் தங்களுக்கு வெற்றி-தோல்வி, இன்பம்-துன்பம், உயர்வு-தாழ்வு போன்ற இரட்டைகள் ஏற்படுவதற்கு உரிய காரணங்களை ஆராய்ந்தான். அவைகள் பழமொழிகளாகவும், பொன்மொழிகளாகவும் இயற்கையின் நியதிகளாகவும் புழக்கத்தில் கொண்டுவந்தான்

புவிஈர்ப்பு சக்தி, மின்காந்த சக்தி போன்ற கண்ணுக்குத் தெரியாத சக்திகளை பரிசோதனை கூடத்தில் ஆராய்ந்து அவைகளை நமது தேவை களுக்கு பயன் படுத்தி கொண்ட அளவிற்கு இயற்கை நியதி சக்திகளை ஆராய்ந்து உபயோகப்படுத்திக்கொள்ள நம்மால் முடியவில்லை. காரணம், புத்தர், வியாசர் போன்ற ரிஷி வாழ்க்கை, தவ வாழ்க்கையில் அப்பழுக்கற்ற ஈடுபாடு உடையவர்களால் தான் சிக்கல் நிறைந்த இயற்கையின் நியதிகளை புரிந்து கொள்ளவும், கடைபிடிக்கவும் முடிந்தது.

இயற்கையின் நியதிகளை யாரும், யாருக்கும் கூறி கட்டாயப்படுத்தவோ, செயல்முறைப்படுத்தவோ முடியாது. இயற்கையின்நியதிகளை கூறி தண்டிக்கமுடியாது. இயற்கை நியதிகளின் உதடுகள் மூடியே இருக்கும். ஆனால், காது வழியே புரிந்து கொள்ளும். இயற்கையின் நியதிகளை குறிப்பட்டு பேசுவதால் சில சமயம் மனஸ்தாபங்கள் ஏற்படவும், மனம் புண்படவும், போன்ற விரும்பத் தகாத விளைவுகள் ஏற்பட காரணமாகும்.

இயற்கையின் நியதிகளை சொல்லி தனக்குத்தானே சமாதானம் சொல்லிக் கொள்ளலாம், எச்சரித்துக் கொள்ளலாம். துன்பம் தோல்வி களிலிருந்து ஆறுதல் பெறலாம் அல்லது வராமல் பார்த்துக் கொள்ளலாம். தன்னை சரிப்படுத்திக் கொள்ளலாம்.

அவரவர் வாழ்க்கையில் அனுபவித்த, கேள்விப் பட்ட, பார்த்த சிறந்த பழமொழிகளை, பொன்மொழிகளை, இயற்கையின் நியதிகளை நினைவில் நிறுத்தி தனது வாழ்க்கை யில் பயன் படுத்தி வந்தால், பிரச்சினைகள் குறைந்து மனஅமைதி கூடும்.

ஒரு கருத்தை ஒருவர் உண்மை என்று உணர்ந்து, பின் அதை கடைபிடிக்காமல் விட்டுவிட்டால் அதனாலுள்ள பலன் அவருக்கு கிடைக்காமல் போகும் .

இயற்கையின் படைப்பில், எல்லாம் அல்லது எல்லோரும் ஒரே மாதிரியாக இருக்கமுடியாது. ஆனால் நாம் ஒருவருக்கொருவரை ஒப்பிட்டு பேசி உயர்வாகவோ, தாழ்வாகவோ எண்ணி நடக்கிறோம்

எளிமை, தூய்மை, கடமை, நியாயம் போன்ற நல்ல குணங்களை அனைவருக்கும் பொதுவான ஒரு அளவு கோலாய் வைத்து அதனுடன் அனைவரும் தன்னை ஒப்பிட்டு பார்த்து நான் எளிமையானவனா, தூய்மையானவனா, கடமையை கருதி நடப்பவனா, நியாயமாய் நடப்பவனா என இந்த உலகமக்கள் அனைவரும் நடந்தால் அனைவரின் மகிழ்ச்சிக்கும், மன அமைதிக்கும் குறைவே இருக்காது. ஆனால் நமக்கு அது மாதிரியான கல்வி இல்லை. எப்படியாவது பணம் சம்பாதிக்க வேண்டும் என்கிற நோக்கத்தில் தான் கல்வி இருக்கிறது. அதற்காகவே தினமும் வாழ்கிறோம்.

இயற்கையின் நியதிகள் ஏராளமாக இருந்தாலும் ஒருசிலதை நாம் நினைவில் நிறுத்தி அதனை பயன் படுத்தி பலனை பெறவேண்டும்.

.நமது கல்வியில் மனம் இயங்கும் விதம் பற்றியோ, இயற்கை நியதிகள் இயங்கும் விதம் பற்றியோ பொதுப் பாடம் கிடையாது. இவைகளெல்லாம் கண்ணுக்குத் தெரியாதவை, புலப்படாதவை, நிரூபிக்கப் படாதவை என்று நாம் ஒதுக்கி விட்டோம். ஆனால் அவைதான் அவரவர் வாழ்க்கையின் ஆணி வேராய் இருக்கிறது

ஈர்ப்பு என்னும் இயற்கையின் நியதி.( Law of Attraction)

ஒற்றுமை என்னும் இயற்கையின் நியதி (Law of Harmony )

ஈடு செய்யும் இயற்கையின் நியதி.( Law of compensation)

காரண காரிய இயற்கையின் நியதி.( Law of cause and effect)

பரிகாரம் என்னும் இயற்கையின் நியதி.( Law of remedy)

பிரிவுகள் என்னும் இயற்கையின் நியதி (Law of Classification)

கர்மா என்னும் இயற்கையின் நியதி (Law of Karma)

திருப்பி செய்யும் இயற்கையின் நியதி.( Law of reciprocation)

மாற்றம் என்னும் இயற்கையின் நியதி ( Law of Change)

விடாமுயற்சி என்னும் இயற்கையின் நியதி(Law of Perseverance)

எதிர்த் தன்மை என்னும் இயற்கையின் நியதி(Law of Polarity)

நினைப்பு என்னும் இயற்கையின் நியதி (Law of Thinking)

அதிர்வு என்னும் இயற்கையின் நியதி (Law of Vibration)

போன்ற சில இயற்கையின் நியதிகளை புரிந்துகொள்ள முயற்சிப்போம்.

ஈர்ப்பு என்னும் இயற்கையின் நியதி.( Law of Attraction)

ஈர்ப்பு என்னும் இயற்கையின் நியதிஎன்பது, ஒன்று அதே போல உள்ள மற்றவைகளோடு சேர்ந்திருக்க விரும்பும் .தண்ணீர், தண்ணீருடன் சேர விரும்பும்.எறும்பு, எறும்புகளோடு சேர்ந்திருக்க விரும்பும். எண்ணங்கள், அதே வகையைச் சார்ந்த எண்ணங்களுடன் இருக்க விரும்பும். இதிலிருந்து நாம் தெரிந்து கொள்ள வேண்டியது என்னவென்றால் ,

நமக்கு என்ன வேண்டும் என்பதில் தெளிவாக இருக்கவேண்டும்.

நம்மை உருவாக்கிய பிரபஞ்சசக்தியிடம் அந்த தேவையை கேட்கவேண்டும்.

அந்த தேவை நம்மை நோக்கி வந்து கொண்டி ருப்பதாக உணரவும், நம்பவும் வேண்டும்.

நமக்கு நன்மை யானது வந்து சேரும்.

நமக்கு எது வேண்டுமோ அதை மட்டுமே நினைக்க வேண்டும்.

எது வேண்டாமோ அதை நினைக்கக் கூடாது. நாம் அடிக்கடி நினைப்பது நம்மிடம் வந்து சேரும்.

ஆனால் நிறைய நேரம் நாம் தவறானவை களையே நினைக்கிறோம்.(90%)

தீர்வில் தான் நம் கவனம் இருக்க வேண்டும். பிரச்சனையை பேசிக் கொண்டி ருப்பதில் அல்ல. .

நல்ல, சிறந்த, உயர்ந்த வார்த்தை களில் நமது கவனத்தை கூர்மையாக்க வேண்டும். அடிக்கடி நினைக்கவேண்டும்,நம்ப வேண்டும். The Law of Attraction .நமக்கு உதவ இது ஒரு சிறந்தவழி.

பிற நியதி களை அடுத்தடுத்து உள்ள விளக்கங்களில் காணலாம்.

--------------------------------------