அறம் - பொருள் - இன்பம் - வீடு
நாம் ஏற்றுக்கொண்டாலும்,ஏற்றுக்கொள்ளாவிட்டாலும் மனித வாழ்க்கையானது அறம், பொருள், இன்பம், வீடுபேறு என்கிற நான்கினையும் மையமாக கொண்டே நடைபெறுகிறது.
மனிதர்கள் அனைவரும் இன்பமான சுகவாழ்வையே நோக்கமாக கொள்கின்றர்.
இன்பமான சுகவாழ்விற்கு பொருட்கள் வேண்டும்.
சுகவாழ்வு நிலைக்கவும், அதற்கான பொருட்களை கையாளவும் சரியான வழிகளை அதாவது, ஒருவரால் பிற ஒருவர் பாதிக்க கூடாது என்பதற்காக இயற்கையின் நியதி ஏற்படுத்தி இருக்கும் கட்டுப்பாடு தான் அறம். இயற்கையின் அறம் பாரபட்சம் பார்க்காமல் நன்மையும் செய்யும், தண்டிக்கவும் செய்யும், விதிவிலக்கும் அளிக்கும்.
அறம் என்பது நியாயம், நீதி, தர்மம் போன்ற கட்டுப்பாடுகள்.
பொருள் என்பது உடல் ஆரோக்கியம், மனித உறவுகள், செல்வம்(பணம்) போன்ற பேண வேண்டியவைகள்.
இன்பம் என்பது பொருள், பாராட்டு, நிறைவு போன்ற வற்றால் ஏற்படும் மகிழ்ச்சிகள்.
வீடுபேறு என்பது இறப்பிற்கு பிறகு பக்குவபட்ட ஆன்மாக்கள் பிறப்பு-இறப்பு சுழற்சியிலிருந்து விடுபட்டு பிறவா நிலையை அடைவது. அதை முக்தி, இறைவன் திருவடி, அவ்வுலகம் என்றும் கூறுவர்.
மனித வாழ்க்கையில் இறைவன் அருளும், ஊழின் தாக்கமும், அறம்வழி குணமும் பலருக்கும் பல விகிதத்தில் பொருள், இன்பம், மற்றும் வீடுபேறு அடைவதற்கு பயனாகவும், தடையாகவும் இருக்கின்றன. குறள் அதிகாரம் 1 கடவுள் வாழ்த்து, 4. அறன் வலியுறுத்தல்.38 ஊழ். அவற்றின் வலிமையை விவரிக்கின்றன.
அறம்,பொருள்,இன்பம்,வீடு என்கிற நான்கினையும் மையமாகக் கொண்டே வேதங்கள், சாஸ்திரங்கள், கட்டுப்பாடுகள், வழிகாட்டு நூல்கள் தோன்றின.
மனித உடலிலிருந்து உயிர் பிரிந்ததும், ஆன்மாவும் பிரிந்து விடுகிறது. அந்த ஆன்மாவின் பக்குவத்திற்கேற்ப இறைவன் செயலால் அந்த ஆன்மாவிற்கு பிறவாத்தன்மை கிடைக்கிறது, அல்லது வேறொரு உடலுள் புகுத்தப்படுகிறது. இதை மாணிக்கவாசகர் திருவாசகத்திலும்,
திருவள்ளுவர் திருக்குறளிலும் குறிப்பிடுகிறார்கள்.
திருவாசகம்.
நாயின் கடை ஆம் நாயேனை
நயந்து நீயே ஆட்கொண்டாய்;
மாயப் பிறவி உன் வசமே
வைத்திட்டு இருக்கும் அது அன்றி,
ஆயக் கடவேன், நானோ தான்? என்னதோ, இங்கு, அதிகாரம்?
“காயத்து இடுவாய்; உன்னுடைய கழல் கீழ் வைப்பாய்” கண் நுதலே!
( எனக்கென்ன அதிகாரம், இன்னொரு உடலில்(காயத்து) இடுவாய்,அல்லது உனது திருவடிக்கீழ் வைப்பாய், முக்கண் உடையவனே)
குறள் 38
வாழ்நாள் படா அமை நன்று ஆற்றின் அத்துடன்
வாழ்நாள் வழியடைக்கும் கல்.
(மனிதன் எல்லா நேரமும், இடைவிடாது எல்லா செயலிலும் அறத்தை கடைபிடிக்க வேண்டும். அப்போது தான் பிறவா நிலை கிடைக்கும் )
திருவள்ளுவர் வாழ்க்கைக்கு இறைவன் அருள் கட்டாயம் வேண்டும் என்கிறார்.
குறள்
பிறவிப் பெருங்கடல் நீந்துவர் நீந்தார்
இறைவன் அடிசேரா தார்
(இறைவனுடைய திருவடிகளைப் பொருந்தி நினைக்கின்றவர்கள் மட்டுமே பிறவியாகிய பெரிய கடலைக் கடந்து சேர வேண்டிய இடத்தை அடைவார்கள்; அதனைச் சேராதவர்கள் அந்தக் கடலைக் கடக்க முடியாது.)
அறத்திற்கு உட்பட்டு பொருளையும், இன்பத்தையும் அடைய வேண்டும் என்கிறார் திருவள்ளுவர்.
குறள்
அறன்ஈனும் இன்பமும் ஈனும் திறனறிந்து தீதின்றி வந்த பொருள்.
(பொருள் சேர்க்கும் திறமைகளை அறிந்து, தீமை ஏதும் செய்யாமல் நல்வழியில் சேர்க்கப்பட்ட பொருளானது ஒருவருக்கு அறத்தையும் தரும், இன்பத்தையும், நல்ல பொருளையும் தரும்)
மாணிக்க வாசகர், எனக்கு எதுவும் வேண்டாம் பிறவாத்தன்மை தந்தால் பொதும் என்று இறைவனிடம் கெஞ்சுகிறார்.
"வேண்டேன் புகழ்; வேண்டேன் செல்வம்; வேண்டேன் மண்ணும், விண்ணும்; வேண்டேன் பிறப்பு, இறப்பு; சிவம் வேண்டார் தமை நாளும் தீண்டேன்; சென்று, சேர்ந்தேன், மன்னு திருப்பெருந்துறை; இறை தாள் பூண்டேன்; புறம் போகேன்; இனி, புறம்போகல் ஒட்டேனே!”
உற்றாரை யான் வேண்டேன் ஊர் வேண்டேன் பேர் வேண்டேன்
கற்றாரை யான் வேண்டேன் கற்பனவும் இனி அமையும்
குற்றாலத்து அமர்ந்து உறையும் கூத்தா உன் குரை கழற்கே
கற்றாவின் மனம் போலக் கசிந்து உருக வேண்டுவனே.
தனக்கு வேண்டியது என மாணிக்கவாசகர் உருகி கேட்பது,
"பாருரு வாய பிறப்பற வேண்டும்; பத்திமையும் பெற வேண்டும்;
சீர் உரு ஆய சிவபெருமானே, செங்கமல மலர் போல்
ஆர் உரு ஆய என் ஆர் அமுதே,
உன் அடியவர் தொகை நடுவே,
ஓர் உரு ஆய நின் திருவருள் காட்டி, என்னையும் உய்யக்கொண்டருளே.
முழுமுதலே ஐம்புலனுக்கும் மூவர்க்கும்
என்தனக்கும்
வழிமுதலே நின் பழ அடி யார்
திரள் வான் குழுமிக்
கெழுமுதலே “அருள் தந்து இருக்க
இரங்கும் கொல்லோ என்று
அழும் அதுவே அன்றி மற்று
என்செய்கேன்”பொன்னம் பலத்தரைசே.
உண்மையில் மனித மனம் ஒரு நிலையில் இல்லாமல், ஆணவம்,சுயநலம்,பேராசை,கோபம், பொறாமை, பயம், கவலை, மற்றும் உண்மை, நன்மை, நியாயம், பணிவு, இரக்கம்,நன்றி,உதவி என அவரவர் சூழ்நிலை, உடல்நிலை, இறையருள், ஊழ்நிலைக் கேற்ப அவரவர் மனதில் எண்ணங்களாக ஓடிக் கொண்டிருக்கும். அதுவே பேச்சிலும்,செயலிலும் வெளி வரும்.
ஆக, நல்லதும்,தவறும் செய்வது மனித குணம். அதை கூறும் குறள் 504.
குணம்நாடிக் குற்றமும் நாடி அவற்றுள்
மிகைநாடி மிக்க கொளல்.
நான் தவறுகள் செய்யக்கூடியவன், அவற்றை பொறுத்தருளி எனக்கு மீண்டும் பிறவாமை வேண்டும் என்கிறார் மாணிக்கவாசகர்.
திருவாசகம்
வெறுப்பனவே செய்யும் என் சிறுமையை
நின் பெருமையினால் பொறுப்பவனே அராப்பூண்பவனே
பொங்கு கங்கைசடைச்
செறுப்பவனே நின்திருவருளால்
என் பிறவியைவேர்அறுப்பவனே
உடை யாய்
அடியேன்உன் அடைக்கலமே.
சமயம் கிடைக்கும் போதெல்லாம் குழுவாக சேர்ந்து திருக்குறள் மற்றும் திருவாசகம் புரிந்து படிப்பது, படிக்க வேண்டிய கட்டாயத்தை தரும். அதனால், மறந்து போன அல்லது தெரியாத உண்மைகளை நினைவு படுத்தும். மனதை மென்மை படுத்தும், ஆறுதல் அடையச்செய்யும்.
இந்த இரண்டு நூல்கள் போன்ற பிற நூல்கள் உலகில் வேறெங்கும் கிடையாது என்கிறார்கள்.
இந்தியாவில் ஆங்கிலேயர் காலத்தில் , தமிழ் நாட்டில் கிருத்தவ மதத்தை பரப்ப இங்கிலாந்திலிருந்து திருநெல்வேலிக்கு வந்த G U போப் என்கிற பாதிரியார் இங்கிருந்த போது தமிழ் கற்று இங்குள்ள திருக்குறள், திருவாசகம் படித்தார். உருகிப்போனார் பரவசமடைந்தார். அவற்றை ஆங்கிலத்தில் மொழி பெயர்த்து இங்கிலாந்துக்கு எடுத்துச் சென்றார் என்பது வரலாறு.
கற்றல் நன்று. கற்பித்தல் நன்று. கேட்டல் நன்று.
சிவமயம்.
